2015-06-02
劉BB 九個月快樂~
今個月快了update 因為又到一年一度的淡季
(對, 每年6-8月就是最輕鬆的日子 可以一整天上網睇自己野都無問題ge!)
體重: 11.39 KG
身長: 74 cm (唔知係咪真係發過燒的關係 突然高左啊!!)
奶量: 6安半奶奶 x 4餐 + 一餐半粥仔
發展:
爸爸媽媽都識叫了 不過叫爸爸係"阿爸阿爸" 而且叫得好重怨氣的
叫媽媽就係好似唸緊"cool" 咒咁, 不斷媽媽媽媽媽媽
轉身, 坐, 爬對佢黎講已經無難度了 最近自己學企
企左起身後又唔識坐返低喎@@
對自己的玩具好粗暴, 成日好大力拍打玩具, 我已經stop 過佢好多次
仍然係任何玩具玩之前都要擺入口試下味先, stop 完佢先會拎出黎, 轉頭又繼續擺入口
學識拍手後, 成日都拍拍手, 有時一邊拍一邊尖叫 自high 好開心咁
唔識舉起手byebye 但就識合十合十咁, 即係叫佢同人講byebye 一定要拎起佢隻手
生活習慣:
已經習慣左分房分床訓
雖然唔捨得 但唔想等太大先黎訓練佢
一覺訓天光 唔中意蓋被 因為佢睡相太差了!
想轉身如果俾張被阻住, 就會大喊
第二朝7點左右就會自己起身, 今日試過偷望佢
佢起左身後會自己訓喺床上面玩腳, 玩公仔, 好enjoy 自己玩喎~
食
好開心 食多左好多 由半碗到而家一碗了
早上見到大人食早餐 佢就會開始扭食 所以變相佢都有早餐食
不過佢唔咬野的, 好多時候因為心急所以直吞
飲多左水 以為俾個水杯佢淨係會玩, 而家真係會慢慢飲下水
姑娘講過 食完固體後盡量唔好補奶, 但我呢個仔太愛飲奶奶了
基本上食完粥仔半小時後就會開始狂叫奶奶奶奶
所以都係會補奶俾佢飲＿
話咁快就九個月大了!!! 又期待又唔捨得~~~
由於劉bb 係9月B 所以好多N班都唔會收佢
不過唔理喇, 報左先算 有得in 就in 無都無所謂啦
而我最大的難題又來了...
奶奶見而家BB 咁可愛 無啦啦又話想湊返佢
但佢就唔敢同我講 佢係同老公講je 而老公知我唔中意都無咩點出聲
無謂令大家唔開心啦....
錢已經係其次, 但我發覺佢根本唔識照顧BB
曾經試過我同老公出去食飯, 俾佢湊半日
先知原來佢唔識幫BB 換片的.... 到我返黎幫BB 換片見到pat pat 紅晒先知原來佢半日無幫bb 換片
到教識左佢之後 佢幫BB 換片用爽身粉 原來支爽身粉已過期一年@@
最近佢又走去買左件新衫俾BB 著 趁我唔喺度就幫BB 換
返到屋企我已經問老公件衫洗左未 老公話奶奶洗左啦 咁我都算喇
到夜晚沖涼時 見到BB 全身起晒紅粒 再問返奶奶先知佢用D 不知名番梘幫BB 洗衫令BB 敏感
叫佢沖奶俾BB飲佢都唔識 (因為奶奶以前係全埋身人奶媽) 仲問我點解唔全埋身餵咪唔駛煩囉!
(大佬!! 唔駛返工咩!!? 你估我洗奶泵奶樽好好玩咩!)
有時都唔想同佢講太多 廢事佢又話我鬧佢 通常都係老公代答就算喇!
而家無啦啦又話想湊返BB 唔好搞我啦... 唉!
