減肥血淚史

2015-07-27  並非曬命  真心想紀錄低

相信呢度好多都係媽媽級  絕對明白產後修身係有幾難
小洚亦都係一樣  雖然本身手腳幼  望上去可以呃到人
但上磅一磅  沖涼時照下鏡子  就知道自己多麼嚇人

小洚中學時都係一個肥妹仔  有130磅左右
考完a-level 升大學後  可能因為考試壓力大  加上做幾份part time 所以減左好多
到一直出來工作  體重都係100磅左右  影pre-wedding前更有只有96磅 (好耐無見過的雙位數字)
不過婚後再無刻意keep fit  懷孕的時候真係瘋狂咁食

可以一日食一個蜜瓜  半夜突然想食杯麵  麥樂雞都試過
到了懷孕後期  體重已達至146磅  BB Size 又大左兩週
導致要飲糖水  不過好彩最後無中到妊娠糖尿  但是飲食已開始收斂
因為我打算順產的 怕BB太大我生唔出 (雖然仁安都book 左位)

產後體重好快變返128磅  但坐月後又上返去135磅
儘管小洚係親自湊返劉BB  家務都係自己做返  再加上餵人奶
但體重都仍然無跌過
到了11月正式上班時  體重仍然有12x 磅
由於小洚個子不高  所以同事們都有婉轉咁話下我

仍然記得某天下午到了某商場逛街  見到一件外套好靚
示意店員拎俾我試試   店員望左我一眼之後就只是說了一句
"呢件衫係細碼  你著唔落架"  跟住就走左去serve 其他客人了!
當天既自卑又生氣!!!! 雖然佢講事實, 但未免太沒禮貌了吧!!!!!

第二天我就同老公講!! "我一定要喺30歲生日前減肥成功!
我係一個非常好勝, 同時又好有毅力的人  說得出也一定做得到!
但由於我太為食  而且當時仍餵人奶不能節食  所以主要都係運動多

早餐: 鈣思寶+麵包/麥皮
午餐: 出去食 (沒有刻意選擇食甚麼米粉  總之不要選炒河之類吧)
晚餐: 一份水果  + 湯 + 白肉 + 兩口飯
如果當天口痕吃了薯片雪糕等零食... 第二天晚飯就只吃餸了
如果是出去食  咁就無辦法減食 (因為好怕浪費食物)
最愛仍然是打邊爐, 放題可以瘋狂地吃啊! 哈哈哈!!

運動:
每天早晚必定拉筋&伸展運動, 或者做骨盤枕運動
上下班會早一個站落車行返屋企
吃完午飯後會行樓梯返公司 (我公司5樓啫)
晚上因為想爭取時間陪劉BB 玩  因此都沒有特別外出跑步
假日就會跳一小時鄭多燕

維持了一段時間  體重跌到52kg (114磅) 左右  其實已經開始放鬆&半放棄
因為怎樣努力都無法見到個4字... 我又開始照常飲食
好快體重又上返少少  我又再努力做返運動

過了一個月後  終於見到49.x kg 在磅上了  好開心
星期日的時候老公突然話幫我睇住BB 兩小時  叫我好好Shopping 一下

到了上星期  keep 住自創的餐單,, 加上運動  而且又要湊住巨B
體重終於返家鄉了  心裡有說不出的興奮喔!

雖然... 未到所謂的100磅  不過算了  也不奢求啦... 下星期生日週要放縱一下吧!
如果真的要追多個  到時希望我可以節制少少  肥46磅真係俾健康院姑娘見一次鬧一次
但我真係好想食啊... 控制唔到自己.... 我都唔想架....@@

劉BB 識企喇! (10個半月)

平時我多數一個先update 一次劉BB 的進度
但呢幾晚(17.7 - 19.7.2015) 十個半月的劉BB 好似進步左, 實在太開心了
所以一定要記一記低先!

星期五
姨姨屋企樓下的區議員辦事處有提供影相服務
咁我地都帶埋劉BB 去影
之前都驚佢唔合作  因為唔可以抱住影  佢都有少少唔合作
當佢見到攝影師的相機鏡頭  就立即坐直對住鏡頭笑
成個辦事處嘅人都覺得好好笑  上一秒都仲唔肯自己坐低

星期六
我們一家多數都會返爺爺麻麻/公公婆婆屋企
咁岩今個星期有個親戚去左奶奶度
見到BB 當然係咁撩佢玩  我仔當然無任歡迎啦
但當對方抱起佢時  佢就開始扭計  不斷叫BABABABA
(因為爸爸成日教佢叫BABA 囉)

對方仍然唔放返佢落地  佢竟然識咬人地膊頭同埋拍人地塊面
到我抱返就立即笑晒  真係好搞笑
老公話, 佢咁識反抗都無咁易俾拐子佬拐走了  哈哈!

星期日
劉BB 由上個月開始基本已經可以扶住野企
當然佢都試過放手啦  一定會即跌  除非背後有野挨住

尋晚我地兩個大人食飯
佢無啦啦放手企左喺度  我都無為意
係老公突然話: "嘩! 老婆你睇下, 佢自己企呀!!!"
咁我地兩個大人立即放下筷子拍手  讚佢叻叻
佢知道我地讚緊佢  就同我地一齊拍手
(不過因為太突然  無準備電話影低添)

上星期的劉BB  我地教佢玩彩虹圈  佢隻隻都想擺入口食
我地當然NONONO 咁教佢啦  捉住佢隻手將個圈放入個STAND 度
一放手, 佢就會擺返入口
尋日如常同佢玩  佢竟然識自己拎起放入個STAND 度
當然只放到最大個3個  最後2個比較細佢放唔到  就唯有爸爸輔助啦
不過我心裡面好開心  佢唔會再將任何野第一時間放入口

佢亦都識得將玩具箱裡面的玩具一件一件拎晒出來
然後自己走入去玩  當我想鬧佢  BB 你曳呀  佢就會笑住咁望住我
咁我就會鬧唔出口了  真係好古惑呀!!

************************************************
劉BB 之所以咁高大(我唔高架  老公就高)
我覺得唔止係因為佢乜都食
(蔬果  肉類  粥仔粉類咩都岩食 --> 唔偏食  呢樣似我, 唯一最自豪的地方)
最重要係訓得 (呢個就唔知似邊個了)
星期日我地通常都唔會周圍去  始終最近天氣熱
劉BB 又未識行  我地會在家同佢玩  同埋播兒歌俾佢聽下

星期日的時間表
8:00  劉BB 起身  飲奶 (6安)
8:30  會所游水 (其實係踢下水)
9:30  沖涼  又訓覺了
12:00  訓醒  床上面自己玩  跟住飲奶
13:00  食水果  聽兒歌  佢會一邊聽一邊拍手  同埋玩玩具
14:30  會一齊落街食野 買餸
16:00  BB食粥仔或星星粉  又沖涼  又要訓覺
18:00  起身  我地會同佢一齊睇書仔  玩益智玩具
20:00  又開始扭眼訓  飲奶奶
基本上佢飲完奶奶之後就會俾返個奶樽我  跟住自己攬住個枕頭自己訓
想哄下佢訓都唔得呀... (咁鬼獨立嘅)

平時的劉BB  因為無時停  成日都會撞到頭呀, 手呀等等
但真係唔會喊  只會坐低望下我地  我地檢查完無事後佢就會繼續玩
嗯... 呢D 叫堅強? 獨立?

劉BB 開始大了  在生活上我們都有少許改變
我亦比以前更勤力做家務 (無工人就唯有自己上)
我以前都算係手機不離手的人  不過而家... 基本上係BB 訓左我先會玩手機
因為始終唔想俾佢地咁早接觸呢一類產品
咁我唯有作出取捨啦  反正平時一至五大把時間俾我玩

做媽媽真係唔易  而家仲要進修添  不過為了工作前境無辦法啦
希望我頂得順! 加油!!!!!

Playground 試堂

小洚住馬鞍山的  一直希望每星期俾BB 返一日PG
目的都係想佢有其他BB 同佢一齊玩下
同時我都想學習下點樣可以訓練BB 的小肌肉... 發展等等
由於我地多數都係星期日先得閒
所以都想近近地返下屋企附近的PG

比較左好多間PG  有D 英文PG 價錢比較貴
我覺得劉BB 先10個月  咁快返英文PG 都無咩用
所以我想揀D 普通PG 俾BB 玩下先

最後揀左兩間  分別安排了兩個星期日試堂

6月尾的一個星期日
我們選了一間連鎖的PG 位於沙田中央廣場 (屋企有Shuttle bus 去  都算方便)
一入到去老師會要大人小孩都洗手  地方不大  有7個小朋友上堂
年紀相若  都係識爬識企未識行的BB 仔
之後就會有15分鐘free play time  BB 會自己玩下玩具
時間到了 就會叫小朋友幫手Clean Up  當然一班BB 咁細  多數都係媽媽捉住BB 隻手啦

之後就會圍圈圈自我介紹同埋唱下Hello Song 咁  個個BB 都會拍拍手
跟住就開始玩下彩虹傘、傳下波波、做少少訓練小肌肉的運動
最後仲會派小小星星餅俾BB 練習下自己擺入口

好快就過了一時間  而劉BB 可能因為第一堂  表現唔好
整堂都在尖叫  嚇到坐隔離的BB 都哭了  (真係唔好意思呀......)

到離開的時候  我都有同老師講尖叫呢個問題  老師話雖然佢唔係專家
但佢叫我每次BB 尖叫時  都同佢數數字  數英文字  佢會平靜D
咁我就真係試下做啦 的確  每次佢尖叫時我一數數字 佢就會望住我而且STOP 尖叫了

優:
1) BB 年紀相若  活動都岩10個月的BB 玩
2) 地方不大  但都好乾淨
3) 老師都唔錯  有禮貌  而且唔HARD SELL

劣:
1) 雖然有Shuttle Bus 但每次都專登去一去沙田
2) 學費貴少少  每堂大約貴$20 左右
3) BB 不斷尖叫  唔知係佢唔中意呢個環境  還是 心情問題

到了七月的第一個星期日
我就到了區內一間PG 試堂  屋企出發行過去都係15分鐘左右
地方就同另外一間差唔多  都係好colourful 咁啦
不過我聞到一陣油漆味  (但老公話聞唔到) 同埋冷氣唔係好夠
呢d 都唔係問題

最大問題係... 我一入到去  眼見全部BB 都係已經識行
我就奇怪了  問其他兩個媽媽 BB 幾大  一個13個月 一個14個月
但我報名時明明係報9-12個月PG 班的
咁老師就話因為今期唔夠人數所以兩班暫時一齊上
我本來想走的  但佢立即俾資料我睇  話其中兩個BB 都係10個月
不過咁岩今日請假了  佢地都玩到PG 的遊戲
咁老公就叫我睇定D 先啦...........

第一個活動都係唱下歌仔咁... 之後就拎把膠扇俾BB 撥雞蛋
之後就有位老師吹泡泡  成班小朋友當然走黎走去追住D 泡泡啦
而我個仔 根本唔識爬  就只能坐喺度睇

跟住就拎左兩個好大的瑜珈波出黎俾小朋友推波波
對於我仔黎講  都係唔識推的  同埋場面都幾混亂
我仔一邊爬一邊推  其他小朋友都推得幾快 我仔都幾次趴在地上

推完波波之後  佢地就拎左盤水出黎  叫一班小朋友圍住個盤
用一個小杯筆水去一個大杯度  咁我就捉住我仔隻手筆
其他小朋友都可以慢慢自己筆  咁老師就叫我俾小朋友自己筆
咁我就放手啦  一放手  阿仔第一時間用大力將個小杯打入D 水度
水花濺起就整濕左其中一個家長條褲  我當然即時道歉啦....
位媽媽仍然黑晒面  仲同佢老公講, "咦!? 有冇搞錯呀! 整濕晒"
老公立即再次SAY sorry 同埋叫我地唔好玩水喇... 驚整濕人

跟住個game 就係跨欄+行平衡木+行樓梯
大部份識行的BB 都係一隻手拖爸爸一隻手拖媽媽去行
但我仔只係識得爬 我地要成個"稱"起佢黎行
行左一次  我終於忍唔住坐埋一邊了....

後來個miss 走黎問, 我都答返佢, 呢個小遊戲我覺得唔太岩未識行的BB 玩.
我亦唔想整到BB, 唯有坐下休息下啦....
最後另一個老師就拎左張厚墊同另一個花生形狀的瑜珈波俾劉BB 玩左一陣打發時間

個miss 就不斷講喇, 就話自己係N班面試老師, in 細B 多.
知道可以點train 好細B, 自己好有經驗等等, 講左幾次
落堂又繼續講, 咁我都係話考慮下先就走了!

優:
1. 近, 唔駛BB 要搭車出去咁辛苦
2. 課堂內不能拍攝, 但佢有位職員會影相, 落堂可以上網DL 返D 相落黎
3. 價錢較平
4. 劉BB 今次好投入, 無咩點尖叫. 究竟係環境定心情呢?

劣:
1. 我覺得課程好無規律, 玩玩下會無啦啦轉左其他遊戲
2. 課程編排唔好... 9-15 個月編埋一班唔知點玩
3. 老師都幾hard sell

我唔係覺得第二間PG 唔好, 只係覺得佢課程唔適合劉BB 啫, 因為我上網睇呢間PG 都有支持者的... 但我相信每位媽媽都想為子女揀一個最開心的環境學習

最後... 我諗左幾日, 都係決定去沙田返, 不過唔係而家. 係等BB 一歲先. 呢兩個月繼續同我地去公園玩下, 去會所游下水先啦。

家庭照

一直都好想同BB 影一輯家庭相
但影婚相始終唔同影BB  唔係愈貴愈好
最終都係睇主角合唔合作
為免浪費金錢  我地決定搵間平平地的試一試

終於在5月底  我們就到了荃灣影家庭照
BOOK 左5點影相  我們俾BB nap 了兩小時
3點起身  3點半飲奶  4點出門口
準時到達studio

其實$500 左右的價錢 (4個造型+家庭照) 真係無咩期望 點知去到個場地真係唔錯
起碼乾乾淨淨先啦

整個過程劉BB 都好開心  完全無扭計
影得興奮過我地  所以好順利呀!
一離開STUDIO 後  我地就去食飯 而劉BB 就訓左了
所以我地好開心咁打邊爐了 埋單後BB 就剛剛醒  真好!

等了兩星期後  終於可以睇相  好多相都影到劉BB 好開心
所以我都加左錢攞晒所有COPY  最後埋單$1200 就拎晒150張相
感覺都唔貴呀!! UPDATE 下BLOG 分享下  亦幫自己做一個紀錄

先做小廚師  呢個傻BB 見到D 水果勁開心  以為真係可以食掛
係咁想擺入口  我同老公當然要極力阻止啦!

之後就扮機師  哈哈  我眼中當然覺得佢靚仔過CAPTAIN COOL 啦
(FANS 唔好鬧我呀唔該  HAHA!!!)

扮完機師  第三個造型就係史迪仔  劉BB 一見到咁多公仔後簡直係開心到亂爬啊!

最後  就係因為媽媽的偏好  當然要扮下熊仔啦
職員好細心  影呢套熊仔時  特意將冷氣開大少少
因為怕熱親BB 會發脾氣 (咁大人就會凍少少喇)

影完之後就影家庭照
傻豬仔呢個時候已經開始大笑同尖叫了!

好中意呢張  因為BB 識YEAH 呀!!! 好開心~~~

同爸爸影呢相都好開心呀!!!!

成個拍攝都好順利  D 相基本上都唔駛點執  不過後期我有自己PS 執左少少光間同details 位
希望下次可以再去影  或者生多一個先? 哈哈... 我都唔知!!
始終我無四大長老幫忙... 都係希望等劉BB 讀書先再算吧......

劉BB 成長紀錄 - 十個月

2015.07.02

時間真的過得很快很快...
已經七月了  BB 又大一個月了!
劉BB 成嘗試了很多的第一次

首先講講成長進度
體重: 10.5 KG (輕了, 未知是否無時停呢)
身長: 74 cm 吧...... (無度)
奶量: 變返6安奶奶 x 4餐 + 一餐粥仔
而家仲要加埋水果, 小食等等

發展:
呢個月突然唔叫媽媽了, 只會不斷叫爸爸或爹爹, 有時我抱住佢都係叫住爸爸
到爸爸真係去抱佢時佢又唔要... 佢只係要我...
令我懷疑佢都係叫我做爸爸 我要多D 教佢叫我媽媽先得喇!

扶住企已經好熟悉  好大膽 成日放手自己企
企一秒就會跌返低  有時真係好怕跌親佢
因為佢次次坐低都好大力呢!!

唔知你幾時識行第一步呢!

已經出緊第5隻牙仔了  所以更喜歡咬人  特別係咬爸爸

開始對圖畫書有興趣  每晚飲完奶奶後我都抽時間同佢一齊睇故事書
佢會一邊睇一邊微笑  好可愛  不過睇一陣佢就會想擺本書入口了  哈哈

另外, 去日本城買左個箱仔教佢clean up 玩具
每次教完佢  轉個頭佢就幫我倒晒出黎之後走左去
總之我一執佢就倒晒出來  搞到我好嬲又好笑  激死我

其他方面就無乜大改變了, 同上個月差唔多

父親節的時候  我們一早就帶左劉BB 去游水
仲以為佢可能會驚會喊  點知... 勁開心
走果陣仲唔捨得添呀... 游完水同爸爸開冷氣訓覺
可憐媽媽.... 咪做家務囉!!! 所以嬲嬲地我就POST 佢地的相上面書喇! HAHA!

第二個星期... 會所泳池終於開左 我地就去樓下游了
點知... 可能劉BB 眼訓啦  唔係好肯游水呀... 成日都想抱抱


而劉爸爸都好開心過左第一次的父親節
明年啦... 明年我叫BB 整條呔俾你帶  唔駛心急呀老公! 哈哈!

而上星期 因為有優惠 我地亦帶左劉BB 去試堂返PG
好多BB 都係差唔多年紀  一係就驚驚痴住媽媽  一係就發呆
但劉BB 一入教室見到玩具  就立即爬去玩具埋度玩  連爸媽都不要了

詳情下一篇Blog 再講

食
暫時搵唔到野係佢唔中意食的
不過食野仍然係好心急 唔太中意咬就直吞
識得自己用飲管飲水  完全唔駛教  食就真係好叻了!

而十個月果一日  媽媽俾左人生第一隻烚蛋劉BB 食
佢一邊食一邊露出趣怪表情  餵慢D 都唔得
相當佢應該都中意食蛋吧?

隨住佢愈來愈大個... 多左互動,,, 我就愈來愈唔捨得出門口返工
因為佢好似會好唔捨得咁 不過... 為左令BB 有更多資源  我仍然會繼續選擇做WM 的
亦因為想事業更進一步  我昨晚開始放工後還要到浸大進修
回家後BB 已經睡了  其實都有少少失落啊! 不過真係多謝老公支持我每一個決定啊!
將屋企打掃得整整齊齊  把BB照顧得好好  令我一返到屋企就可以休息了!