在職媽媽的辛酸

不知不覺間做了媽媽八個半月了
由以前放工就可以HEA 到而家放工要衝返屋企
不過都開始習慣了

以前放工, 唔駛趕的, 可以行下先返屋企
而家, 基本上唔駛見客, 準時6點我就閃人
好彩同事們都知我係百無的在職媽媽
即係無工人, 無四大長老幫手湊B
所以我每日都係準時接手照顧BB
姨姨自己都係放工休息架嘛~~~

有時媽媽會提出, 叫我擺BB 在娘家幫我湊幾日
但我又覺得照顧BB 係我責任
同埋BB 開始認人了 唔想佢覺得我地掉低佢所以寧願辛苦少少
如果病就無辦法  因為唔想傳染BB 嘛

我份工要出差的  四月尾就返左大陸四日
真係好掛住個仔  不過好彩有SKYPE 可以見下BB
不過因為忙  所以時間都過得好快
其實公司而家都盡量唔安排我出差
但有時要見自己的客就真係唔可以假手於人
事實上 在職媽媽又唔係大晒嘅
逗得人地份糧就一定要做好自己本份

而家每天Lunch 我就會去買菜 (肉就星期日買定)
放工後我就會返屋企煮飯 整D 簡單菜式 (第二日老公仲要帶飯)
咁老公就會照顧BB, 抹下張playmat 睇住佢
食完飯之後我就會沖涼, 老公就洗碗同埋沖奶
我沖完涼就會餵奶換片, 同BB 玩一陣, 就哄BB 訓覺
好彩佢9點就會訓  所以我都有2個小時私人時間睇下電視

星期六就忙lu 中午老公就會帶BB 返奶奶屋企食午飯
下午3點左右就離開  返娘家見下公公婆婆  食埋晚飯就會走
公公同婆婆為左BB 都改用智能手機了

雖然係忙同累  但至少星期日我可以休息下 做下家務
同埋帶BB 去公園或商場行下  佢星期日訓覺次數都多D 架!!! 哈哈~

雖然每天都忙  但我仍然好感謝老公
因為我仍然可以同朋友仔Gathering  老公從來都唔會催我返屋企
每天晚上腰酸骨痛時老公會幫我按摩一陣等我舒服咁訓
以前佢機不離手  而家佢會幫忙做晒家務哄左BB 訓覺先玩ipad
所以我都無再囉嗦  咁大個人  你玩到凌晨一點訓  第二朝準時起身返工我都唔理了

仲要多謝姨姨  因為真係幫左我好多
有時公司唔能夠即時請假  BB 病了  姨姨幫我帶佢睇醫生
上星期試過紅雨 大雨到不得了 姨姨為了唔想BB 淋親雨又叫我擺BB 在佢家
明天又唔駛趕住返工  我就在姨姨家同BB 玩到訓覺先走
有時想同老公拍下拖食餐飯  姨姨一定會OK, 叫我地唔駛趕返黎慢慢食

尋日上網見到有個姨姨呻, 幫人地湊BB, 個媽媽走數, 唔出糧俾人玩失蹤
因為見到個姨姨好人唔惡  就一個月拖一個月  我覺得好過份!
大家都係打工  準時出糧係基本常識吧  點解有人可以咁無賴
自己個寶貝俾人湊  都可以放心唔出糧???

將心比心... 我點都會準時出糧俾人  就算姨姨次次都話唔急我都會照出
唔得閒俾CASH 佢都一定會銀行過數  無可能要人地貼$$ 湊B

姨姨個仔仔功課上有困難我都會教佢  因為有時姨姨知答案但唔識教
我以前幫人補習所以教小朋友有一手  大家都會互相幫忙
關係先會好!! 所以真係唔明點解呢個世界可以有人咁衰!!!!

P.S. 姨姨話BB 好似麵包超人喎, HAHA