劉BB 成長紀錄 - 八個月

2015-05-02 

劉BB 八個月快樂~~

嗯... 最近開始幫BB 諗個英文名了

因為佢開始大個, 有時想叫下佢個英文名方便返playgroup用

我有個朋友係幼稚園老師, 佢話佢有個學生唔知自己叫咩名,

只有叫BB 先會應, 因為父母都係叫佢BB

所以, 我都係時侯幫佢諗個英文名, 

我唔中意D 太難讀的英文名, 簡單D 就好, 最好兩個音, 哈哈

各位Blog 友有咩意見呢?

入番正題

體重: 11.2 KG 

身長: 70 cm (高左2 cm, 但因為識爬之後運動量大左所以冇乜點肥過)

奶量: 6安半奶奶 x 4餐 + 一餐粥仔 (有時可以食一碗)

發展:

今個月突然唔再叫爸爸, 改口叫媽媽, 扭計時都狂叫媽媽

識坐, 不過我開始覺得佢唔係坐得唔穩呀... 而係唔中意坐

有時放佢喺playmat 上, 佢一定要一個大枕頭俾佢  訓又好, 趴又好, 總之有大枕頭就會乖D

已經爬得好快了  轉身都轉到好熟練 基本上而家幫佢換片一定要超快手

識自己玩玩具  但任何玩具玩之前都要擺入口試下味先

我地會同佢講NO, 佢就會停止擺入口  但當唔睇住佢就會擺返落口

生活習慣:

每晚8點半就開始扭奶, 飲埋奶換埋睡衣9點就會訓覺

通常要自己碌10分鐘就會訓著, 仲一定要趴睡或者攬住枕頭訓

第二朝7點左右就會自己起身, 不過有時都要我地叫先起身

而我就會趁住空閒嘅15分鐘同佢玩一陣

最近教緊佢拍手, say byebye 同goodbye kiss

帶佢去姨姨屋企, 會經過一個公園仔, 我會成日指俾佢睇, 呢個係樹, 呢個係車等等

而家我一同佢講, BB , 邊度有車車呀, 佢就會自然望住馬路果邊睇車

食 

進步了好多 (我指固體) 由食半碗而家可以食一碗

不過有時佢食完粥仔都仲會喊, 係咁叫"奶奶奶奶"

佢知道食粥係mum mum, 食奶係奶奶奶奶

所以有時姨姨會whatsapp 可唔可以補奶奶俾BB 因為佢狂喊

我都會俾佢飲返4安  先8個月, 唔想咁快咁HARSH

同埋都唔想要姨姨難做

佢應該唔太愛酸, 因為佢中意食瓜類, 粟米多於蕃茄

試過餵佢食火龍果  唔夠甜佢就唔食了!

星星餅已經成為佢最愛, 而家見到星星餅就會爬過去

用口咬開個蓋 (當然咬唔開啦) 開唔到就會扭食

但基本上我每日都只係俾一粒佢食下過口癮

除非出街搭車扭計啦... 要塞住佢把口

傻豬仔係一粒開心果, 所以無論係公公婆婆爺爺麻麻都非常愛錫佢, 

BB 就連見到樓下看更都甜笑, 唱歌俾佢聽就會笑到卡卡聲

同埋佢好驚人地喊, 有次我同老公出完街去接BB 返屋企,

姨姨扮喊話唔捨得佢, 佢立即摸姨姨個頭, 就唔跟我地走了

有次佢發神經大叫時唔小心打到我隻眼, 我扮喊同佢講媽媽好痛, 

佢就摸下我塊面, 仲立即收聲唔再大叫, 呢個舉動我覺得好sweet 啊!

上個月係姨姨生日, 本身我想請姨姨食飯, 但姨姨堅持唔想我破費

咁我就同老公在姨姨生日當天代BB 送個蛋糕俾姨姨食

多謝姨姨咁用心照顧我隻肥豬仔