劉BB 成長紀錄 - 十二個月

2015.09.02

又到2 號  今個月好特別  因為十二個月  等於一歲了!
一歲之後其實不再叫BB 了  而是幼童呢!!

媽媽仲整左段劉BB 的成長片段紀念  不過因為我係電腦白痴所以都係用APP 整咋

呢度有部分BLOG 友都有我FB  所以一早收到你地對劉BB 的祝福了! 多謝大家啊!

成長進度
體重: 10.18kg 成長線75%
身長: 76cm ...... 不知不覺間又高了  希望你快高長大!!

奶量: 兩固三奶 (慢慢會加多一餐固)

發展:

講野方面無乜大進步  仍然都係果幾個字  最近叫做學識左ABC

會成日ABC 但應該唔知係邊個英文字

教緊佢眼耳口鼻  不過問親佢  佢都唔會指自己的  會指問佢果個人

叫爸爸當然最熟練  媽媽都唔肯叫  就算叫我都一樣叫爸爸@@

企同行都未完全做到  企一陣都ok ge, 行最多兩三步就會跌 

不過我同老公都唔心急了  每個BB 發展都唔同  我見劉BB 都好努力

自己成日試行  跌完又再起身行  我知道佢一定好快會識行ge!!

而家有8隻牙仔  最近開始想教佢刷牙  不過每次想刷佢就咬我

咬到我同老公都流血  究竟點先可以令佢乖乖俾我地刷牙呢??

最近好中意將玩具掉晒出圍欄以外  每次佢掉我就收拾

不過之前聽好多媽媽朋友話唔好理佢  由得佢掉掉下見我地無反應佢就唔會再掉

所以我而家扮睇唔到  希望之後會有改善啦~~

識舉手, Give me five, byebye 同埋飛吻

想要d 咩會自己指住  直到拎到手為止

好有自己脾氣  如果佢想要的佢一定要  唔想要的你點塞俾佢都唔要

有不滿就會發脾氣  試過佢用玩具掉我  我唔同佢玩

佢知道我嬲的  但又唔會哄我  自己又拎轉頭自己玩

到我氣消了話抱抱佢  佢就會立即四萬咁口撲埋黎~~

食方面  keep 得唔錯  會食通粉做早餐  

除了基本野 (即南瓜、蕃茄、蘋果、肉類等) 都開始食烏冬  會飲湯 (好中意)

仲有食芝士粒  麵包  蛋糕  提子乾等  樣樣佢都會食到拍晒手

不過有時我買左提子俾佢食  我唔知道咁酸  俾佢試第一啖  佢立即推開同埋擰頭

我立即試食  原來酸到咁@@ 媽媽知錯了  下次會記得試味先

上星期日試左一次用杯飲奶  佢飲左一半就唔肯了  一定要用樽仔先肯飲埋剩返的奶

咁我唔知佢係咪唔中意隻杯啦? 下午我就裝其他飲品入去俾佢飲  佢就飲得好開心喎!

咁睇黎佢係唔習慣用杯飲佢d 奶奶呢~~ 不過唔緊要啦~~ 慢慢戒!! 

最愛梗係騎膊馬啦  每次有得騎就好開心了