懷孕17週

2016.06.20
17weeks4

話咁快已經懷孕17週  除左每月一次去私家醫生度產檢外
今胎都無咩特別注意  (健康院一直都未去呢! 而家book 左7月先第一次去)
如無意外都會揀返順產  希望第二胎可以生得快d 唔駛痛咁耐就好了

之前15週去產檢  醫生話應該都係仔仔  oh... 又係仔仔
雖然醫生話七成準  但通常照到仔仔都好準架喇!
最初失望會有少少掛?  唔知點解有左之後, 對仔女無咩感覺了 (覺得健康就足夠)
見到人地D 囡囡好可愛時就覺得好想生女
但其實我自己本身都係一個唔太打扮的人  生左個女唔知會點呢?

老公講得岩  兩兄弟將來感情會好過好兄妹
因為喜好都一樣  可以一齊去踢波 玩車車
我自己屋企都係 我哥由細到大好錫我 但佢同我細佬感情始終好d
會一齊去買衫  一齊去睇波  一齊踢波  一齊睇戲  一齊去旅行
可能男仔話題點都會多d 掛!? 所以小時候好希望有個姐姐或妹妹呢!

其實 生仔生女都一樣 都係個天送俾我嘅禮物
最緊要身體健康  聽聽話話就得喇

好多人話第二胎個肚會大得好快  但我到而家都唔係好見肚
所以搭車時都無乜人會讓座  通常我都企埋一邊唔好俾人撞到就ok了

過左15週後 由一日三、四嘔減少到三日一嘔  算係舒服左好多
不過坐太耐車都係會想嘔  所以到而家都係隨身帶住嘔吐袋
胃口好左  體重都重左了  而家暫時51.8 kg
但係呢兩個星期成日想食甜野 (我無大肚時係唔太好甜食的)
所以而家都好擔心中妊娠糖尿  不過自我控制力變得好低啊!
老公成日話我:"恃住大肚就任性" ...

呢胎陀得比上一胎辛苦  主要係因為湊住劉BB
劉BB 正值trouble 2  成日都扭計  有好多事未做得到但又要自己做
我都會放手俾佢試  但試完就要執手尾

平時返工有姨姨湊  放工我會自己湊返  劉BB好中意坐喺我大脾上聽故事
有時會唔小心壓到我個肚仔  雖然佢都知我個肚內有個BB  不過始終未識得"小心"
所以我時時刻刻都提高警覺 有時真係怕左佢
陪玩就全部交俾爸爸喇!

劉BB, 希望你將來會錫下細B 喇! 話晒佢都係陪你一齊長大的"手足"啊!