劉BB 成長紀錄 - 二十個月

2016.05.25

呢個月身體一直都唔太舒服  所以一直都無寫二十個月成長紀錄

下星期其實都二十一個月架喇... 不過有心唔怕遲啦... 最緊要都係俾自己睇返嘛

二十個月 11.28kg  84cm 高 (點解又瘦左... 不過好彩有高左)

飲食
最愛就係食食食 

早餐可以一個人飲完一支奶  再食蛋糕再食多兩塊方包

最近俾燒賣佢食  佢可以不斷食  好似唔識飽咁

不過我都驚佢消化唔到  會控制下佢  唔俾佢狂塞野入口

午餐或晚餐  要自己食  唔俾人餵

開始唔想坐定定食  想一邊玩一邊食 (呢樣我最唔想)

有次佢想一邊玩一邊食  我索性唔俾佢食

但屋企老人家又覺得我太HARSH  最後我奶奶開住ipad 餵佢食

我即時發火!! 一直我都想保持食飯的好習慣

唔想以後都一邊睇ipad一邊食飯！！

睡眠作息

一直都唔錯 八點半左右就會想訓覺  因為已經分床訓

所以擺佢落床等佢自己碌  佢九點前就會自己訓著  唔駛哄

但如果作病扭計  佢就要我地坐喺隔離陪佢  佢先會訓得著

發展 

講野仍然係好麻麻  無咩大進步  不過肯試講 (但都講唔岩音)

暫時都無野可以做到  只可以繼續keep住同佢講野 

希望9月返n班後  會有大進步啦!

聽指令就唔錯  有垃圾會識自己掉去垃圾桶

好有手尾  沖完涼會熄自己關水喉  自己關門  飲完水會"come" 返好個蓋擺返好

返到屋企第一時間亦會企喺廁所門口等我地幫佢洗手

好熱情  出入大堂見到看更都會主動揮手打招呼

就算返娘家見到樓下個看更一樣會咁做  人地一讚佢有禮貌佢就會好開心

認知方面進步左好多  上個月都仲未搞清楚身體上的器官

今個月突然識晒  指身體上的任何部位都指得出  有d無教嘅但佢都知係邊度

BB真係會突然叮一聲咁成長

我諗讀左書之後  應該會長大得更快呀  開始有D唔捨得添  哈哈...

其他

愈大就愈痴身  好似身上裝左磁石咁

放工同放假  基本上我去到邊佢就跟到邊

呢樣真係令我好開心

因為我始終唔係ftm  但佢見到我就最痴我

如果我抱緊佢  其他人掂下佢  佢會喊同推開

最中意佢拎住本書  主動坐我大脾要我講故事俾佢聽 

最近剛剛過左第二個母親節  對於一個歲幾的BB 暫時未知係咩一回事

不過佢都好乖咁錫錫我  母親節無咩特別慶祝啊! 只係去公園玩下

呢個時侯同爸爸一定係最FD  因為媽媽暫時唔可以抱住佢周圍跑了!