劉BB 成長紀錄 - 七個月

遲了的七個月

劉BB 在4月頭的時候已經七個月

體重: 11 KG (米芝蓮BB)

身長: 68cm

奶量: 4餐奶 + 一餐粥仔 (奶就6安 粥就半碗)

發展:

已經識得叫爸爸... 可以叫足一日, 爸到老公暈

曾經叫過一次媽  唔知係咪我聽錯喇..

識坐, 但坐得唔穩呀... 同埋好懶坐  反而中意爬

成日都爬  不過只爬兩步就會趴低

食, 麻麻地  主要係佢無耐性食

有時會嫌我餵得慢想企圖搶左個碗

食到一半之後有時會喊, 要扭奶

最愛都是飲奶奶

7個月暫時試過
水果: 蜜瓜, 蘋果, 香蕉, 梨
蔬果: 南瓜 蕃薯 蘿蔔 蕃茄 節瓜 粟米 薯仔

肉: 三文魚 同少量豬肉 (但佢唔中意)

零食: 白麵包  星星餅

佢食野好麻煩  如果果日係食蕃茄配豬肉 佢唔食  一定要配魚先食

飲水  如果唔係用佢的學習杯飲就唔飲

最愛星星餅  有時搭緊車  佢扭計  只有星星餅可以安撫佢

有試過佢喊到尖叫 (好騷擾人) 我就局住俾一粒星星餅等佢分下心

點知有個正義之士行埋黎話在車廂不准飲食 BB 都唔准

當然我知道道理上佢冇錯  但一個BB 擺一粒星星餅落口含住啫

係咪真係咁不能忍受呢?

不過都廢事出聲喇  唔想上YOUTUBE 俾人公審呀..

而家帶佢出街食飯特別麻煩  因為佢未坐到BB 椅  但又唔肯乖乖俾我揹住食

一定要坐大脾平起平坐  但好多手  隻手成日掃台上的碗碟

所以而家都唔多坐帶佢出街  或者一定要推BB 車先得

開始識認人  有次佢玩口水 我掌佢咀仔同埋話佢唔准  佢立即撲去老公身上

我抱佢都唔要  過左30分鐘後再抱先要返我

不過為左教好佢  我都係要做下惡果個架喇  始終我地無工人 無四大長大幫手

咩都係自己教  當然姨姨都好好會幫我教  不過始終唔係佢仔仔  佢都唔敢太惡

訓覺時會搵我  要我攬住佢訓  但佢睡相真係好差

半夜起身望下佢  佢一定去訓左去窗台或床尾  搞到我都冇覺好訓

最愛沖涼  無論幾時都好  只要可以沖涼佢就好開心  全程都笑晒

最BB 就係呢個時候了  哈哈