劉BB 成長紀錄 - 十六個月

2016-01-02

遲來的新年快樂... (哈哈... 唔係好遲啫... 都係一月咋嘛...)
祝大家身體健康! 心想事成!
好開心呢度識到好多BLOG 友
其中有部分係YAHOO 戰友
見證住大家一齊由少女變靚太再變靚媽
雖然  我轉左GOOGLE BLOG 後少左好多UPDATE
但其實我都有KEEP 住睇下大家的BLOG
學下煮野食  學下點同BB 玩  大家都係一邊做一邊學!

就算大家素未謀面  感覺就好似睇住對方的小朋友慢慢長大咁
其實都好有親切感  希望大家的小朋友都快高快大  聰明伶俐啦^^


好啦... 又再UPDATE 下成長進度

體重: 24.7 lbs
身長: 79cm
奶量: 仍然三固兩奶 但真係食極都仲要扭食 唔識飽

發展:
講野方面無乜進步  不過都唔急得咁多
好多人話男仔會比較遲識講野  又或者佢真係有咩障礙我都未知啦
等歲半返健康院評估先知  都唔擔心得咁多

不過佢聽指令好好  知道有需要時
識得自己去攞尿片、鞋、奶樽、水杯
知道要去沖涼都識自己除衫除褲 (要大人幫少少手)
聽到我話要覺覺豬喇  就自己走去床邊等我抱佢上床
亦唔需要氹訓覺  自己碌碌下就會訓了

但最近呢個星期佢早上5點就左身企喺度
係咁叫爸爸過佢房抱佢陪佢  不過我地無理佢
亦無開燈  有時佢企一陣就會自己訓返  有時就企到6點幾我起身

識上樓梯  識跳一下 (少少離地)  同埋playgroup 教左佢轉圈後佢成轉轉轉

性格:
好急噪呀... 無耐性  唔肯坐定定  又手多多
有時坐車太耐佢就發脾氣或者尖叫  愈鬧就愈叫
我已經嘗試ignore 佢  但佢真係一時時  呢樣真係最令我頭痛
劃左個冷靜區俾佢  如果佢玩玩下玩具發脾氣或者大力掉玩具
我會叫佢行過去唔俾玩  佢當然唔肯啦
多數爸爸會陪佢一齊過去  等到佢唔再發脾氣先再俾佢返黎繼續玩



希望trouble 2 唔好再更上一層樓啦  真係怕左佢喺街度尖叫或扭計喔........!