我們的結婚兩週年紀念日 (三) - 澳門遊

繼續...

第二朝我們一早起就床了 因為劉BB 是早起寶寶

我們本來打算再返百老匯大街覓食的 因為有好多茶樓可以食點心
(劉BB好愛燒賣和流沙包的)
但原來整條大街的食肆都還沒有開門
最後我們選擇了翠華吃一吃就算了

銀河這間翠華地方十分寬敞 亦有安排BB櫈

不過沒想到一個all day breakfast 也要$98 真的很貴吧!
最後我們只選擇了普通的港式早餐

吃飽又周圍逛逛影相

12點我們check out 後坐賭場車出發新馬路午餐
到了朋友的店吃麵  無味精的湯麵連劉BB 都可以食

本來想上大三巴但人山人海  推著BB車的我們根本無法前進
最後還是到其他地方吃吃喝喝算了
我們吃了胡椒餅、義順燉奶、咖哩牛雜等等
真的很飽很飽

快樂的時間過得好快
我們的回程船飛是5點半  所以我們5點就到了碼頭準備上船

回到香港已經7點  我們因為太累了選擇搭的士回家
劉BB 上的士後不夠5分鐘就已經呼呼大睡了

總括來說  劉BB 雖然平時會吵吵鬧鬧
但原來外遊時還是會好聽話好合作
嗯... 下個月等我完成最後兩科的考試  我們就計劃一下去旅行吧 (講住先啦)

我們的結婚兩週年紀念日 (二) - 澳門遊

2016.03.13

上回離題了  不斷回顧兩年前的事
(可能因為老公出差了  有點想念他吧)
今篇就講我們怎樣慶祝兩年紀念日

因為星期六日基本上我們不會撇下劉BB單獨活動
我們在想慶祝活動時也要預劉BB的份
最後決定澳門遊  一來測試下劉BB外遊時的表現
二來最近澳門酒店也便宜了 所以就決定出發澳門

出發前老公已送了花給我  好開心

我們住的是銀行旗下的JW 萬豪酒店 

由於2015年才開始營運  基本上是非常新淨的

本來是3點Check in 的  但因我們2點已經到達 酒店都立即為我們安排入住

房間非常舒服  最興奮的一定是劉BB! 在房內跑來跑去 

酒店也特別安排了BB床給劉BB 不過我還是自備了私家BB枕頭

最令我欣賞的是房間內的枱角都是圓的

亂衝亂撞的劉BB 也試過數次撞到但沒有尖角感覺沒那麼痛吧

(至少劉BB 撞到後都沒有哭)

心情大好的劉BB

影返張家庭照先  有親子裝架

我們休息一會後就到官也街掃街了  先到誠昌吃水蟹粥 yummy!

吃飽飽當然是甜品啦  木糠布丁 劉BB 不斷搶食

可能劉BB 都長大了  知道外遊都表現到好興趣  心情大好

每次問他  BB開心嗎? 開心就笑啦

他也露出招牌見牙不見眼的笑容

吃飽飽周圍逛逛 我們就回酒店附近逛逛百老匯大街

沒太多人真的很好  可以好輕鬆地慢慢行

一邊行一邊拍照  累了就坐下來吃東西  感覺真寫意

到了晚上  我們先安頓好劉BB 待他睡了我們才到酒店的餐廳吃自助餐

其實食物款式都跟香港差不多啦  最大的分別就是價錢了

群芳有齊我想吃的東西  也是$350 一位

感覺就是比較抵啦  哈哈

我們的結婚兩週年紀念日 (一) - 回憶篇

2016.03.14

2016年2月28日是我同老公結婚第二年

踏入我們拍拖第四年 老公突然問我  結婚是不是好麻煩的?
我說不知道喔  因為我沒有結婚的經驗
老公就說我覺得我們是時候結婚了 (對! 無鑽戒無99支玫瑰求婚呢!> <)

就這樣  我們當時就一同去了某一屆的婚展了

仍然記得當日因習俗而要改早婚期 (同年11月改早至2月)
在改好日期後就知道自己懷孕
當時的心情真的好複雜喔!!
曾經有想過不如改後一年 等BB出世一併擺啦
不過最後都照原定計劃結婚了!
最後我就懷孕5 weeks 都照常同老公結婚了

幸好  早一年已經影婚紗相  其他事項亦已準備得七七八八

當我決定要改期時 我的好姊妹二話不說的說沒問題
到後來知道我有左後更加貼心照顧
叫我不用擔心  她們不會有姊妹紛爭啦 哈哈
(姊妹團是來自中學同學以及舊同事呢!)

結婚的時候  BLOG友小高甚至為我製作了迎賓的cupcake

還幫我送上酒樓  真的令我好感動啊!
本來我還打算留一個給自己品嚐的  但姊妹告訴我一放出來就被搶空了
小高真的很厲害!!


不知不覺間  結婚兩年了
雖然老公不是浪漫型  但我知道他為我改變好多
由從前家裡的大少爺變了今天的全能老公
我星期六日放假  在家一定要午睡的
老公會幫忙照顧好劉BB  也會好好打掃家裡等我起來再一起外出

他是很喜歡吃住家飯的  但平日放工他知道我累了
就說不如在外邊吃或買外賣回家吧!
如果某一天我煮了飯 他一定會幫忙洗好碗抹好廚房
水果也不用我切 他一定幫我準備好

所以不知不覺間  我開始覺得自己成了廢人呢! 哈哈!

雖然家裡也不是大富大貴  但至少我們有自己的家
老公知道我和奶奶不能住在同一屋簷下 結婚前都決定搬出來住
當然  我知道老公為了我付出  我對奶奶也是客客氣氣的
儘管有時奶奶的說話令人多麼生氣  我也忍了  畢竟一星期才見一次
說到底  奶奶是老公的媽媽啊! 他不喜歡我其實也是因為呷醋  覺得兒子被搶了...
可能到了20年後  我也會怕劉BB 被"搶"走呢? 哈哈!

多謝老公 盡力將最好的生活都帶給我和劉BB
希望我們若干年後還能像現在般恩愛吧!!

劉BB 成長紀錄 - 十八個月

2016.03.10

今個月遲左寫呀  係因為想去完健康院先紀錄
18個月  歲半了 由一個BB 變做一個小朋友  感覺好奇妙

好開心又係老公陪我地一齊去打針 唔駛我單打獨鬥
我地約左三點  登記左後等左半小時先入去磅重
原來歲半已經係企喺度磅重了  我地仲幫佢度埋高添
11.17kg  81cm 高  成長線75  (已經由95跌到75了 oh no!)

磅完重又要等多45分鐘先見姑娘  真係太多人了
好彩健康院內有個小地方俾d 小朋友跑下
我另外仲帶左貼紙書俾劉BB玩下  等佢無咁悶

一同佢講, 貼埋呢張就唔玩住喇  立即唔高興  不過都好快收拾心情同我入房見姑娘

入房後姑娘俾左3粒小積木俾劉BB 叫佢疊  平時喺屋企疊到的

但今日竟然唔肯疊  試左4, 5 次都拎住個積木唔放手

咁姑娘就俾個假電話俾佢  叫佢聽  佢都立即做到

之後就係考下佢識唔識自己用匙羹"筆"野入口食  同埋俾個杯仔佢識唔識飲水

呢兩樣佢都無問題  仲識請埋爸爸媽媽飲添

跟住就問下BB 行路方面同言語方面有冇問題? 

行路行得唔錯  不過就唔識講野  淨係識BABA & MAMA

之後就全部都BB話  所以姑娘都要求BB 兩歲再返健康院評估

有d 人會覺得"下? 要再評估咁慘?"

我覺得幾好wor  再評估有咩問題? 有咩咁慘呀?

真係發現有問題都可以有專人跟進嘛!!! 

劉BB 自理方面一向都OK 

識自己除衫仔放入洗衣籃 放返好對鞋仔

玩完玩具都會幫手擺返好

用杯飲水都無問題  最近學緊自己刷牙

上星期天氣較熱  開始左第一次POTTY TRAINING

不過今個星期天氣凍  都應該遲D 再正式開始  

因為未識講野  所以成日手指指點我地幫佢手拎野

家中四大長老都好心急驚BB 唔識講野

但我自己就一D都唔急  我細個咪又係兩歲先開金口

而家一樣能言善辯  所以有得佢順其自然發展先

最近睇左有關學生跳樓的新聞  個心真係好唔舒服

好多家長第一時間彈出黎指責學校  覺得係教育制度問題?

咁家長本身真係無問題咩? 三歲就想小朋友學A-Z, 三字經、唐詩

個個都想自己小朋友十項全能  唔想自己小朋友被LABEL "次一等"

不知不覺間  小朋友慢慢成為家長SHOW OFF 的工具了..

我同事個仔仔今年讀小一  年年考第一  

但係佢前幾日做功課時 有一題叫佢寫下有咩心願

小朋友寫:"希望不要有很多功課 不想每天做練習"

睇到呢句  我同事都開始反思呢個問題  點解小一學生就已經咁唔開心?

呢個世界有叻人  亦有資質平庸的人

有人做醫生律師  亦有人做司機裝修工人

好希望  學校同家長都一齊檢討下而家的問題

還小朋友一個快樂童年吧!! 

劉BB 去公園玩

2016.02.26

小朋友大個左  真係會好中意去公園
劉BB 亦唔例外  只要經過公園就會手指指示意想去玩
但因為公園的小朋友都係3-7歲的比較多
玩起上黎唔識話特別照顧小朋友
所以劉BB 都成日俾人撞跌  好彩佢跌低左唔會喊
我就由得佢自己爬起身自己繼續玩

而去公園亦都變左我地放假其中一個節目
又唔駛$$ 又可以呼吸下新鮮空氣 又可以幫佢放下電

玩到熱  外套都除埋

最近生活上有少少唔開心  但見到小朋友的世界真係好簡單

跑跑跳跳已經可以咁開心 真係好羨慕

好彩我自己都係唔開心一陣就可以拋諸腦後的人

好希望呢個世界可以變得美好D 煩惱都少D