半歲生日會

2015 - 03 -01

8點半大家就醒左  忙完一輪已經十一點  

臨走前亦幫BB 換上今日生日會的DRESS CODE - SUPER BB

我們有一個902 媽媽會  裡面個個BB 都係同年同月同日生的

大家都傾左半年  終於約出黎聚會  順便慶祝BB 半歲生日

地點係昇悅居會所  地方好大好靚啊!!

大家分工合作  有媽媽負責訂蛋糕  有媽媽就搵贊助  有媽媽仲出埋禮物俾大家抽獎

有媽媽就負責訂衫仔俾BB 今次主題係超人  好可愛啊!!!

由於賣家SEND 錯左款式俾我 所以劉BB 果件係唔同D 架

亦都因為佢特別大隻  所以大家就叫佢超人隊長了  哈哈!!!

大家傾下湊B 心得  抽下獎  影下相  食埋蛋糕都已經過左兩個半鍾

個個BB 走果陣都係訓晒覺的  因為玩到好攰了!

最後四點半大家就走  我同老公太累了所以索性CALL 車返屋企

返到屋企5點就立即幫BB 沖涼餵奶  

雖然呢兩日好累  但BB 好開心呀~~ 成日都笑到卡卡聲!

累都唔緊要啦... 歡樂無價呀~!!!

到你一歲時  我地又帶你出去玩啦~~ 你要乖D 呀!

Wedding Anniversary

2.28 是我們的結婚紀念日

撞岩係星期六  我們一家人要去愉景灣酒店住一晚
帶埋BB 出去真係好麻煩的  好多野帶  但我地又唔想丟低佢喎!
頂硬上啦~ 哈哈!!

正當我餵BB 飲奶時  老公話落去買早餐食
一上到黎就有花收  好靚的橙色鬱金香呀!!
好開心呀!! 老公話要多謝我為呢頭家的付出
白天一早要返工  放工返黎又要親自照顧埋BB
仲要煮埋飯俾佢食~~~

中午12 點我們終於出門口  去到酒店都差唔多3點了
酒店有WELCOME CARD 俾我地 有海景房 仲安排左張網床俾BB 訓

地方好靚  好外國Feel  好多都係外國人  好舒服呀!!
我地放低野之後就落去行下影下相

大約四點餵完BB 後  佢訓左覺  我地兩個就可以靜靜地食晚餐
近近地食酒店Buffet 算喇! 睇openrice comment 唔太好本身都冇期望
但原來又唔錯喎! 除了冇生蠔外  其他都幾好呀!!
甜品亦非常多款式  老公話mini cupcake 幾好味  唔會勁甜呀~!!

食飽飽去附近行下  又再經過教堂  裡面都好靚呀!

唔知將來有冇朋友結婚會喺呢度註冊呢!?
跟住去惠康買定聽日早餐  連BB 坐的車仔都有得玩  好可愛呀!
不過劉BB 有排都唔坐得啦 哈哈~~~

大約8點就返去了  同BB 抹身餵奶之後都差唔多9點  佢玩左一陣就訓覺喇!
佢好中意喺張網床裡面玩

不過因為我仲病病地  所以我地都好早訓覺了!!!
第二日仲要參加半歲生日會~~

農曆新年假期

今年新年真的好忙好攰
除了打掃  仲要辨年貸等等
好彩公司D 野俾我做到七七八八
所以放工都有時間俾我買下野

今年公司年三十已經收左爐  到初九先正式開工
所以可以連續十天24小時對住劉BB
真的好開心啊!!!


年三十晚等埋老公放工就一齊返奶奶度食團年飯
有時間就幫劉BB 扮下靚  平時多數都係著舊衫咋
新年就著下新衫啦...

大年初一一早就返奶奶度拜年
食埋中午飯就返媽媽度  劉BB 就開心啦
個個都俾大利是佢
佢都好開心  因為一接到利是第一時間想放入口
我就買左個袋仔俾佢  等佢可以擺好D 利是
同埋唔好MIX 埋我派出去果D 呀!

 



大年初二我們在家休息一下
因為其實我同劉BB 都仲咳緊
一家三口在家休息下  睇下碟玩下玩具
下午有個中學同學上來坐一陣
很快就走了 晚上同老公食車仔麵算數


大年初三有好朋友黎拜年  帶左好多書仔俾BB 睇

我地一齊去飲完茶後就返去睇戲
之後老公有朋友要上去  我就同自己朋友去屋企樓下戲院睇叮噹
好感動啊!!! 不過因為我對叮噹的劇情太熟了
所以都知道晒成個故事講咩
夜晚同奶奶, 老公的朋友去酒樓食飯
食飽飽老公的堂家姐又話上黎探下BB
大家傾下笑下又10點了


大年初四本來去老公公司同事的團拜  但取消左變左無所事事
爸媽又話掛住BB 所以就叫左佢地過黎飲茶

食飽飽又同劉BB 玩  我就可以休息下
玩到四點半就走了  老公話唔駛日日出去食  所以今餐佢煮!!


大年初五身邊好多朋友都開工了
一班中學同學放左工就上來拜年  我就準備左PIZZA & SUSHI 招呼大家
跟住大家就圍埋一齊開賭局  玩左三公同射龍門
嗯... 無贏無輸咁啦... 約左下星期去另一個同學屋企繼續玩

大年初六唔出街了  俾劉BB 休息下
在家練轉身同玩玩具  訓下覺  不過在家對於我來說
一樣係咁攰的  因為要照顧BB 同做家務啊...

大年初七老公要返工了  我就帶埋BB 去好朋友家拜年
是劉BB 的契媽媽喔!!! 劉BB 好中意契媽媽  玩得好開心啊!
但契哥哥就KEEP 住午睡  到哥哥醒了 弟弟又夠鐘訓覺喇
哈哈~~ 兩個BB 夾唔到時間一齊玩添

大年初八要返公司開年  成班同事去飲茶
見仲有時間就返公司睇下Email 做下野  唔想之後返工日日OT 啊!
之後老闆返黎派開年大利是  今年加碼  YEAH!

大年初九正式開工
新年假期就咁度過了。

劉BB 成長紀錄 - 六個月

2015.03.02

有了小朋友的時間真係過得好快啊! 話咁快就半年了!
好多set 左的目標都未做到...
好多野想寫但又冇時間逐篇寫
因為24小時真係唔係好夠用  又要返工又要湊BB
自己又唔想將BB 放在家人度一星期先見一次會好掛住的
唯有自己辛苦D 啦...

最慘的就是... 我已經咳左3個多月了...
中西醫各偏方湯水都試過 但都唔能夠斷尾
每天晚上都咳醒 或俾劉BB 嘈醒 所以抵抗力都變差了
好無奈呢!!!!

入番正題  劉BB 半歲了

體重: 9.09 KG (因為之前病所以輕左 不過仍然係肥的)
身長: 67cm
奶量: 5 餐奶 (上午同晚上三餐都埋身  唔知飲幾多  下午就飲5安半)
上星期剛剛開始加固
我呢個媽媽實在太多心了 咩都想俾佢試下
雖然話每樣野都要試三日  但有時忍唔住試兩日就想俾佢試下其他野
在職媽媽唔可以每餐都親自煮俾佢食
每日都係把握夜晚餵水果  同埋星期六日自己煮粥仔或糊仔俾佢食

暫時試過
水果: 火龍果一小塊, 蘋果, 香蕉
蔬果: 南瓜 蕃薯 蘿蔔
零食: 白麵包  BB 手指餅

基本上佢咩都LIKE  會自己張開口要求食
遲D 我都打算買個麵包機整下包包俾佢食
盡可能都想佢健康D (講住先啦)

 


而我都無限制姨姨每日要煮咩俾佢食
一來姨姨本身經驗豐富  二來我俾左個食物表佢
只要佢從食物表中任揀食品整俾劉BB 食  每日話番俾我知我就OK

發展方面:
因為劉BB 屬於肥B  動作可能遲鈍少少  所以五個半月先識轉身

剛剛係新年假期  我可以見證到佢第一次轉身  實在好開心啊!
去健康院檢查時  姑娘都話佢識得拎玩具  企得有直  坐都唔錯  (只得5秒)
叫我開始要多D同佢講野  買D 玩具俾佢玩下

另外佢都好多野講  可以自己喺度丫丫丫 丫足半小時都唔停
如果俾我鬧時  佢都會喊晒咁扮可憐  要我錫晒
夜晚訓覺都淨係要我一個  爸爸抱都唔得  一定要我哄
(老公好傷心喔!! 明明老公對佢的時間比較耐)

出左2隻牙仔了  所以埋身餵奶時都會痛痛地

不過我有慢慢教佢  呢幾日好似溫柔左
嗯... 而我之前諗住餵到佢半歲  但埋身時太Sweet 了
又想餵耐少少  不過我之後就開始要成日出差了
餵到幾耐得幾耐了  我係行呢個順其自然路線
唔想因為一D堅持令到自己大壓力
而老公都係非常尊重我的決定

自己戒左奶咀 因為愛上了食手指喇!
已經叫佢唔好食  都成日情不自禁擺入口
有時仲會塞自己隻手指落我個咀度 好似想請我食咁...
好可愛啊!!