劉BB 成長紀錄 - 十九個月

2016.04.25

原來一直都無寫到劉BB 十九個月紀錄添... 今日睇返先知啊!
都話媽媽我愈來愈無記性架喇!! 失敗~~~


十九個月 11.35kg  82cm 高 (肚腩細左啊!!)

開始識揀食  即係我地食揀熟食時唔可以再拎個包敷衍佢
要食我地果D 我就為左遷就佢  無辣不歡的我  就算去食米線都要揀清湯
早餐亦都唔再食沙爹牛肉或五香肉丁了  一定係食火腿通粉
因為佢點都要痴我幾啖食架....
開始唔中意食粥  要學人食飯或者麵食  連麥樂雞都同我地爭食
有時我都會俾一舊佢自己慢慢咬.... 不過凍野就真係唔俾佢食  因為醫生話佢氣管唔好
而事實劉BB 真係好易咳  可以禁到幾耐就幾耐啦
大少少可能已經阻止唔到了!!
所以放假我一定煮d 豐富d 嘅野俾佢食  好彩佢好俾面~

放假帶佢去剪頭髮  一副緊張樣  之前都係自己剪架  不過整到成屋都係頭髮

都係落街剪啦 

個叔叔好好人  次次剪之前叫我地預早半小時通知佢  佢會消毒晒D 用具先幫BB剪

剪完梗係唔高興啦~~ 人地驚風筒聲架嘛!!!

除左未肯開口講野  認知方面其實都唔錯

有時睇書見到有枕頭  佢會立即入房拎個枕頭俾我
有時去超市問佢邊度有香蕉  佢都可以指出黎
不過就係唔肯開金口講野 (除左唱歌)

例如我唱OH MC DONALD HAD A FARM
劉BB 就會唱E~A~E~A~O~~~
我唱TWINKLE STAR  佢隻手識扮星星閃下閃下咁

有次我晾襪仔  叫佢隨意拎俾我啦  點知佢識得分返顏色或同花款先拎一對俾我
果下真係覺得原來佢係識ge  只係平時唔肯表現出黎

最愛始終係巧虎  可以每朝起身都鍚左巧虎一啖先
如果有時得我一個在家  我又要做少少家務  我就會播巧虎
佢就會乖乖坐低睇  (平時一定會走黎走去搗亂架!!)

好中意玩車車  揀親的玩具都係車類  可能始終係男仔啦~~

自理方面一向都OK  最近仲乖左
肯乖乖刷牙  唔會同我搶牙刷
會主動幫我做家務  例如有件衫跌左落地
佢見到會執返俾我或者擺返喺梳化

好中意睇書仔  成日拎埋D 書要爬上我張床要我講故事俾佢聽

前排發燒啊! 成個人立即無晒精神  唉, 都係果句啦~~ 寧願病的是我~~~~

我最近好中意HKTV MALL 買BB野 (尿片特價時平好多)
佢見到人地送完貨黎  會主動拖D 尿片同濕紙巾入房
真心覺得佢乖左好多啊!!!!! 希望你愈來愈幫得手啦~~
媽媽遲d 真係好多野要你幫忙架!!

工作好忙時  望下床頭的月曆就會好開心架喇!! HAHA!