劉BB 的第二個聖誕節

2015 年的聖誕假期

每年一到了十二月就會無晒工作動力
因為有好多假期  有好多不同的聚會

24.12 平安夜
早上要返工  3點放工後就同BB 一齊去參加Playgroup 的xmas Party

傻豬仔見到爸爸媽媽都帶佢一齊去  興奮到自己喺度傻笑
幼稚園的安排好好啊!
除了平日的唱遊堂之外, 另外仲分別有四個不同的攤位啦... 有波波池... 有小食... 仲有抽獎等

不過對於為食的劉BB  最吸引一定係一籃籃的小食啦  哈哈

玩到4點幾就返屋企喇  本來諗住去新世紀影下姆明
但劉BB 已經無晒戰鬥力所以我地就返左屋企了

夜晚買左D 牛扒壽司生蠔返屋企食飽飽就度過了平安夜喇!

25.12 聖誕節
去左朋友仔屋企參加聖誕PARTY  有3個BB 一齊玩

Join 埋一齊就識爭玩具了

在家玩完  大人食完野  就帶左小朋友去平台的公園玩
係劉BB 第一次自己SIR 滑梯呀  所以佢好開心笑到眼都唔見埋

原本諗住玩到4點半就走  但由於太開心
最後玩到5點半先走  搞到我地要搭的士返公公婆婆屋企食飯添

返到屋企都已經9點  呢個小朋友累到等沖涼期間已經訓著左

26.12 BOXING DAY
呢兩父子一早起身就拆左我之前買果粒大金莎

一早我地就去左屋企樓下飲茶

到了下午就出發去BB 姑媽屋企玩喇!

姑媽住深井架~~ 好遠  但車程總算方便
劉BB 搭車時亦需要不斷食零食同陪佢睇書先會冷靜一陣
(嗯... 係咪要考慮買車呢?? 不過好吃力呢!)
姑媽屋企好大  亦為左表姐仔順利考上中大醫科  我地今日食得好豐富
仲買左份禮物俾佢添!! 我知道讀醫一定好大壓力~~ 要加油呀~~~

27.12
在家休息
下午帶左劉BB 去樓下室內遊樂場玩

佢好開心啊!!
而爸爸媽媽亦都俾佢玩謝左了!

咁就放完幾日假, 期望下星期的假期

劉BB 夾親手指仔!

2015-12-22

BB 真係愈大就愈曳  好多手
上星期  劉BB 就在姨姨屋企  趁姨姨人有三急時衝去玩洗衣機
點知就俾洗手機門夾親隻手仔
最初都以為無咩事  但到左第二朝隻手更腫了
就決定帶BB 去睇醫生喇!

醫生就話BB 隻手指有瘀血要放出黎
再轉介去威院照X-RAY
等候期間劉BB 仲要唔耐煩  大吵大鬧

返到屋企就扭計  又要沖涼又要食飯仔
我呢... 因為公司有個重要會議行唔開
辛苦老公忙左一日去照顧呢個BB喇!

人人都話, 劉BB 今次隻手咁痛 以後就會驚左洗衣機
但事實並唔係咁囉... 佢照舊成日想行去部洗衣機度玩
廚房係有門欄的  但有時我地行出行入佢就會趁機衝入去
又或者玩櫃桶... 玩電線  總之唔危險的就唔玩...
真係睇少眼都唔得  如果得我一個在家
有時連廁所都唔敢去啊...

到左今日  劉BB 隻手指無咁腫了  但都未完全消腫呀...
希望佢快D 好返啦...

劉BB 成長紀錄 - 十五個月

2015.12.02

每個月最勤力就係打呢篇blog 架喇! 因為要好好紀錄一下小寶貝的成長嘛!

成長進度
體重: 無磅 (總之一定唔係輕啦...)
身長: 78cm ... (又係高過1cm )
奶量: 繼續三固兩奶 中間仲要痴下大人飯食添...
完全係金魚肚  食極都唔知飽嘅..

發展:
講野方面仍然無大進步  不過最近呢個月成日講BB 話
一日到黑咿咿呀呀咁  係叫我就最清楚  係咁媽媽媽媽媽媽

其他都算同上個月差唔多  無咩改變
開始用杯飲下水  不過當然會漏啦
食野都開始識用手搣黎食 唔係全部塞晒落口就算

生活:
整亂屋企就係最大的興趣  積木成日左塞一舊右塞一舊
梳化底 玩具箱 電視櫃都係玩具
到我收拾好了 佢就睇唔順眼  係都要整亂晒先罷休

對所有的掣都非常有興趣  而我除了電掣之外  都會俾佢按下掣訓練下小肌肉
上巴士、入閘、樓下開門都要拍八達通  次次都要爭住拍
試過老公唔記得俾佢拍  就放聲大哭了! 哈哈!
每日就係期待果次拍卡  爸爸竟然唔記得  真係過份呀~~

行得好好 轉身 MOU低起身等都行動自如 知道有阻礙物亦會避左先唔會直衝
想試圖跑  不過跑一步就會立即減速了 可能知自己會跌倒吧?

每晚9點自動波返自己床仔訓覺  唔需要我抱  只要我靜靜坐在旁邊他就會乖乖入睡了
有時夜晚兩三點會起一起身  但唔會喊  好快又會再訓返

夜晚自己在床上睇書  玩一陣... 有時我會講故事俾佢聽~~

通常好快就訓著  我再幫佢加衫~~

 

飲食:
感恩完全無偏食  每次我煮出來的  不論是新舊菜式都幫我掃下
他吃飽飽絕對是我最大的成就感吧!!!

性格:
暴躁脾氣仔  好粗魯  如果我大聲話佢  佢仲會想打我添

不過小朋友係白紙一張  我知道要有耐性同愛心先可以慢慢教好佢
所以我都唔介意佢打我  亦唔會打返佢  只會同佢講NO!!
甚至有時唔俾反應佢  佢慢慢就無興趣打我了...

迪欣湖野餐

2015-11-25

由十月開始已經講要帶劉BB 去野餐
但一係就病  一係就有野做  夾唔到時間去
終於上星期日  約左朋友仔一齊去迪欣湖野餐了

而家劉BB 大個仔了  佢知道我地執野就係會出街
所以成朝都好興奮唔肯訓覺
而我又要準備野餐的食物所以7點半就起身準備了

終於10點搞掂晒所有野就出發了
我地最早到  11點已經到達迪欣湖但停車場已經滿晒
有樹蔭的位置亦都被霸佔了

劉BB 坐緊車車時已訓左  老公立即開帳篷等BB 再訓一陣
可能因為有風吹涼涼地的關係  劉BB 起左身後都唔企起身
一直訓係度嘆手指

朋友仔亦陸續黎緊喇  大家都整左好多野食

媽媽們就坐低傾媽媽經  爸爸們就陪小朋友玩
(平時各爸爸都好忙少時間陪小朋友  今日就交俾佢地親子時間啦)

大約玩到5點  大家先收拾離開
而劉BB 呢個傻豬仔可能因為第一次野餐太開心
全程車都笑騎騎 返到去都唔太願訓覺

最後9點半先訓著  而我10點半都立即去訓了  好攰啊!

下次大家約定去第二度再玩  因為迪欣湖真係好多好多人
船仔又未夠年齡可以玩  單車排左幾個鐘都無得玩
又唔可以放風箏  同埋真係都幾多強國人
.......... 不過.... 邊度會無丫........... 唉!

但我還是好開心
因為一班朋友仔可以一齊輕輕鬆鬆去野餐感覺好寫意

劉BB 的 n 班大作戰 (二)

2015.11.14  星期六

(2) CREATIVE Kindergarten (SHATIN)

11月第二個星期六  劉BB 又去面試了
不過今日我要返工  交代左老公整好晒D 野
我八點半返到公司  十點就走人  趕返去同BB 面試

面試時間11點半  我地11點15分已經到達
最後等到11點45 分先入到幼稚園
幼稚園只可一個家長入去所以我要抱住扭眼訓的劉BB 入課室
入到課室後自己搵個位坐到玩玩具
等左15分鐘先有老師過來  劉BB 已經開始想走
對眼亦開始想合埋
(明明已經訓到9點半先起身 咁快就頂唔順了)

老師過左黎之後劉BB 完全無心機玩了
老師叫佢配對形狀都唔太合作
不過老師好有耐性  不斷鼓勵佢  佢都配左兩個
跟住疊積木  我同老師都有鼓勵佢  佢都開始俾反應
之後俾左玩具香蕉同橙叫劉BB 請媽媽食
佢都有請  甚至主動請返老師食
可能因為有人同佢玩佢心情好返少少
最後佢走果陣有同老師講BYEBYE  亦都主動向老師飛吻

全程無考過家長  只係考小朋友玩玩具

一出到校門唔夠5分鐘就已經訓左了

辛苦你了小寶貝  年紀咁細就要面試... 要加油啊! 盡力就足夠了

劉BB 的 n 班大作戰 (一)

2015.11.7  星期六

(1) Catiline Kindergarten

劉BB 第一次去面試
因為劉BB 係細B  所以我一直以為佢係明年初先interview
點知10月中收到email 原來11月第一個星期六已經要interview
對於一個14個月的BB 來說  都唔會識得太多
我但求佢唔哭鬧離場已經好好了!

11點15分已經去到幼稚園  劉BB 一入校門非常開心
因為好多野玩呀  而且剛剛訓醒心情靚爆
逢人必SAY HELLO
而且呢間幼稚園亦唔係我第一志願  所以我心情都幾輕鬆

玩了十分鐘左右就入課室開始面試

老師叫劉BB 配對返0-9 劉BB 當然唔識啦

不過我都叫佢努力試下

最後都配到3-4 個 

跟住就考大細  老師叫佢揀個大的波波俾爸爸佢都做得到

之後考顏色  老師叫佢揀隻紅色的碟俾媽媽  佢揀左不過唔肯俾媽媽

然後考認物  有公仔、假提子、車車  老師問佢邊個係車車

佢一手就拎住架車仔  其實唔係佢識揀  而係佢一向只中意玩車仔咋

最後就指眼耳口鼻  老師問佢鼻喺邊  隻傻豬仔指耳仔  

之後我再問多次  老師問鼻唔係問耳仔喎... 佢就立即指住我個鼻

考完小朋友就問下家長點解揀呢間等等

不過我感覺老師覺得我仔唔識講野 (因劉BB 只識爸爸媽媽奶奶姨姨波波)

我同老師講完之後  佢話剛才對上一個小朋友已經識讀APPLE

我問老師果個小朋友幾大 佢話18個月 咁我話我仔得14個月

老師就話: 其實差四個月咋喎........

(我心裡面的回應: 差四個月呀!! 而家講緊小朋友相差四個月wor!!)

不過無所謂啦! 每個人的想法都唔同...

in 完之後我同老公都好開心啊!

唔係因為覺得劉BB 好叻  只係平時唔耐煩的劉BB 竟然乖乖坐低完成整個interview

有我facebook 的blog 友就知道劉BB 幾惡  又中意尖叫  又坐唔定

但今日呢15分鐘面試佢真係聽老師指令做

就算唔識都無尖叫  老師叫佢TIDY UP 佢一樣有做  唔會想拎埋D 玩具走

走果陣亦都有揮手講byebye! 我係覺得佢好乖  而唔係好叻!

今日眼見有d 媽媽朋友一日走幾場真心覺得辛苦

好彩我無打算報好多間  收就算  唔收就出年K班再in 過

今年攞下經驗就算  最重要係劉BB 有盡力配合媽媽做到最好

已經比一切更加重要了 =) 

劉BB 成長紀錄 - 十四個月

2015.11.02

嗯... 有時見到大家都成日UPDATE BLOG 我都想寫下
但好似無咩記性咁... 星期一已經唔太記得星期六的行程
而且而家陪劉BB 玩時通常我都唔用手機
少左好多機會可以影相啊!! 通常只有文字的BLOG 都唔會太好睇吧?

不過我仍然希望可以Keep 住寫劉BB 的成長紀錄  最少寫到兩歲啦

成長進度
體重: 無磅 (上個月10.46kg)
身長: 77cm ... (又高過1cm 喇!^^)
奶量: 三固兩奶 (早餐要食包包配奶, 中午同下午一餐粥一餐粉, 中間會有水果, 晚上就飲多支奶)

萬聖節不妨應下節扮下南瓜先

發展:
講野方面仍然無大進步  不過佢聽得明我叫佢做的事
叫佢拎尿片俾我  佢都會行過去拎  當然最後都係要我幫手啦..
訓醒覺會意圖想落床 想出街就會拎對鞋遞俾我
著新波鞋好開心  周屋行

想飲水會自己拎水樽啜

唯一唔好的.. 係佢好中意將所以食物一次過塞入口
所以到而家我都會"meet" 碎d 動物餅先可以俾佢自己食
否則佢會一次過塞幾塊入口

學緊用匙羹食野

 




模仿能力比以前強左好多  識得用手巾仔抹面
對屋企其他東西比玩具更大興趣  玩具已經係擺埋一邊了

拎住屋企電視remote 就對住電視  冷氣remote 就對冷氣
拎住我個手提就會擺耳邊  屋企係唔會有手提俾佢拎到
係返娘家時我屋企人的手提就會成為佢目標

行得幾好了  雖然有時行得太快都會跌倒
不過要跌先會長大架嘛!! 媽媽我通常都由佢跌下
去街街就只會去商場或者公園先俾佢自己行

平時街道都盡量坐返車仔  因為跌一跌就會擦損晒了
(終於換左部2.9kg 士的車  真係好方便好輕身)

飲食:
任何食物都愛吃  不過如果佢中午12點食左粥/爛飯  下午4點再餵粥佢就無咁好胃口
所以我盡量都叫姨姨煮其他野俾佢食  另外佢好中意食麵包
可以自己一個食兩塊方塊+奶奶  食完會好開心自己拍手

除了奶奶同水  最中意飲橙汁  所以我放假就會買橙返屋企榨俾佢飲

近呢兩星期我都開始俾湯水(未落鹽)佢飲  不過佢都係中意飲大路的湯水
如果味道太濃佢就會好抗拒了  我亦唔會逼佢飲

性格:
無時停  最慘係成日發脾氣
同埋變幻無常  呢一秒鐘明明笑緊  下一秒就會爆喊  想點?

因為最近輪住病所以放假都無去太遠的地方玩
上星期天氣好就帶佢落公園踩單車  對佢黎講好新奇

 


希望佢好快學識自己踩啦