2016.09.25
陀第二胎真係辛苦好好好多啊!!!
唔知係咪陀馬騮仔的關係, 除了日踢夜踢非常活潑外
最重要係到左而家(33週) 仍然會間中有孕吐....
所以每日都好攰好攰呀...............
9月... 劉BB 已經兩歲了!
但因為我狀態唔好 最後生日正日都無帶劉B出去慶祝
照舊返學 我同老公放半日假一齊陪佢返學 (係老公陪返學 我等放學)
放左學就返屋企食蛋糕
可能大個仔了 佢知道係自己生日 所以我一唱生日歌佢就好開心就拍手
一問佢: 今日邊個生日呀? 佢就會好開心咁舉手... 已經唔係好似舊年咁只係一舊飯
記錄一下先
廿四個月(兩歲) 13kg 重 87cm 高
飲食
大左後對零食的慾望大左好多 成日都扭食餅餅 甚至係糖
不過我多數都係俾D 小朋友軟糖俾佢過下口癮就算喇
食方面佢一直都好OK, 不過有時食得多麵包蛋糕 正餐就會食得麻麻地
最愛飲湯 可以飲兩三碗湯 (不過飲完就只係食到半碗飯了)
都識自己畢飯食 但掌握得唔好 不過佢都肯自己食 唔駛人餵
但老師又話佢喺學校食得好好架喎
所以都唔知係佢喺屋企扮BB 定係老師要求低喇?
！
睡眠作息
依舊8點左右起身 有時10點會訓返 訓到11點半先起身食Lunch 返學
有時就唔會訓 放學時就訓一小時左右 (5點幾就會起身)
八點半左右老公就會逼佢入房 有時陪佢睇書 有時陪佢玩
玩到九點左右佢就會眼訓 健康院姑娘話最好夜晚都唔好俾佢飲奶
但我又覺得好似好慘咁 所以都唔會立即唔俾 只係有時俾有時唔俾
(有時佢八點幾已經好眼訓 我就索性唔俾 佢好快會訓著)
本身係分床訓 但最近唔知點解又變得好痴身
想訓大人床 所以好多時佢都會訓大人床 訓著左老公再搬返佢去自己床仔
好彩嘅係劉BB 通常一覺訓天光 唔會半夜搵我地
發展
講野一般 返左學一個月有進步左 但多數都係BB話同外星話
把口講唔停但又唔明佢講咩果隻
不過好過之前唔太肯講
9月中返健康院 但佢唔多合作 明明識都唔肯做 最後都係FAILED左 要兩歲半再返去
不過我覺得咁樣仲好 有健康院跟住 有咩事都可以轉介
自理都唔錯 最近開始戒片片 有時都仲會失敗
不過佢開始唔抗拒自己去poo poo 要俾d時間佢慢慢進步
大個仔左好多 好似知道自己就黎做哥哥
問佢, 細佬呢? 佢會指住我個肚
同唔同細佬玩呀? 同呀!
玩咩? 車車、波波
有時我唔舒服 我會同佢講 叫佢俾我訓陣 (平時佢唔俾我訓 要我陪佢玩)
但如果我同佢講完 佢真係會出廳自己玩 唔騷擾我
好識保護我 有次見爸爸口痕咬我 我扮喊 佢立即衝過黎推開爸爸再攬住我錫返
跟住再嬲左爸爸 媽媽我就好sweet 喇!! 多左個小英雄保護我
其他
由於老公多左時間陪佢 佢都好中意同爸爸玩
不過如果跌親、扭眼訓 多數都係搵返媽媽抱
如果媽媽唔抱, 佢就會好失望咁, 所以我點都會抱佢一陣先再交俾爸爸
開始返學後 成個人開心左 可能唔駛喺屋企悶啦
老師都話佢表現唔錯 做父母聽到呢句就最開心喇!
七月時公司搬左 車程遠左 返到屋企都7點半8點
少左好多時間陪劉BB呀... 所以打算生完後休息一排就試下再搵工了
畢竟車程遠 返工放工都好攰 真係寧願搵少D
始終陪仔仔長大的時間只係得一次 錢可以遲D 再搵嘛!!!
快D 捱埋10月啦!!! 11月中就開始放假了! 加油!!
